Pasi kanë rritur rrogat, deputetët tani kërkojnë të rrisin edhe dietat që marrin për udhëtime apo benefite të tjera. Në Komisionin e Ekonomisë dhe Financave është miratuar nen për nen projekt-buxheti i vitit 2025, i cili më pas do të kalojë për miratim në seancën plenare.
Projektligji është miratuar me disa kërkesa për ndryshime, të depozituara nga komisionet parlamentare dhe të përmbledhura në një raport final. Pjesa më e madhe e ndryshimeve lidhen me rritjen e shpenzimeve e fondeve për udhëtime dhe dieta për deputetët.
"Fondi rezervë nga 2.7 miliardë lekë do të shkojë në 3 miliardë lekë. Shtesë fondesh për dietat e deputetëve dhe udhëtimet. Shpenzimet kapitale do të rriten me 50 milionë lekë, kryesisht për sigurinë kibernetike dhe blerjen e pajisjeve," - u shpreh deputetja e PS, Antoneta Dhima.
Kur vjen puna për të rritur të ardhurat e tyre, përfaqësuesit e mazhorancës nuk kursehen dhe e bëjnë këtë me metoda të fshehta, duke shmangur vëmendjen e publikut. Ndërsa kur bëhet fjalë për rritjen e pensioneve apo ndihmave sociale, qeveria pret të shohë nëse do të reagojnë qytetarët, për të ofruar në fund një shpërblim që nuk mjafton as për minimumin jetik, por vetëm për t'u mbyllur gojën.
