Sali Berisha ka falënderuar sot gjyqtaren Flojera Davidhi për vendimin e saj. Edhe pse prej ditësh kishte sulmuar GJKKO-në për vendimin e pritshëm, ai uroi para ndjekësve të tij në selinë e PD-së që ligji dhe morali të udhëheqin çdo punonjës të shtetit shqiptar.
Në ditën e parë të lirisë, në oborrin e selisë së PD-së, ai u ndal tek përpjekjet për të shkatërruar PD-në. “Ky skenar do të kishte qenë i suksesshëm sepse u sulmuam nga mafia dhe drejtësia e Soros. Ne ja dolëm,” – tha ndër të tjera kryetari i PD-së.
“Hap pas hapi kemi shtruar rrugën që do të na sjellë në pushtet. Të gjithë deputetët sot janë bashkë. Na vodhën flamurin e PD-së dhe e morëm me betejë. Na izoluan, por ne kemi mbështetjen e dy rezolutave ndërkombëtare. Sali Berisha u arrestua sepse ishte simboli i antikorrupsionit të shqiptarëve, sepse e vetmja provë që gjetën ishte bamirësia e bërë nga familja dhe vajza ime,” – ishin fjalët e Berishës drejtuar militantëve që kishin mbërritur në selinë e demokratëve.
Nga sot – sipas tij – PD do të përhapë dritën e rrugës së shpresës dhe do të jemi kombi i shpresës. Sali Berisha e ka lënë jashtë sulmeve sot Altin Dumanin dhe Prokurorinë e Posaçme. Shigjetat e tij u drejtuan ndaj Ramës, me ultimatumin që duhet të largohet sa më parë për t’i lënë vendin një qeverie teknike.
