Nga Agim Xhafka
Sot në mesnatë dorëzohen në
KQZ listat me emrat e kandidatëve për deputetë që do të garojnë më 11 maj. Si në gjithë fushat edhe për votime ia kemi arritur të jemi “krijues”. Askund në glob nuk ndesh një kod zgjedhor si i yni, ku 100% populli voton jo birin a bijën që do, por atë që i afrohet. Si dialogu:
-Keni sufllaqe me qepë?
-Jo, qepë nuk kemi, po e bëjmë me domate.
Politika shqiptare ka bërë studime të thelluara që kryetarët e partive të kenë gjithçka në dorë dhe deputetët e ardhshëm të gëzojnë me shumicë servilosjen dhe lëpirjen e kryetarëve. Nëpër kutitë e votimit njerëzit kanë para një listë të mbyllur e një të hapur. Që duket se po funksionon një demokraci e kulluar. Në fakt lista e mbyllur është si ai gardiani i burgut që ta cakton veç çelsi i tij ajrimin apo ngrënien e vakteve. Dhe lista e hapur është një truk që gjoja i jep liri zgjedhjes së votuesve. Por dhe këtë listë e harton lideri e në total nr i deputetëve që rrjedh nga kjo gjoja përzgjedhje nuk kap as 30 deputetë. 110 të tjerat i pjellin kryetarët. Ata janë materniteti i parlamentit shqiptar. Veç dy persona me lopatën e tyre “mbjellin” fidanët te ajo sallë që quhet kuvend. Ndaj janë seriozë e të palodhur që të zgjedhin persona me krime mbi kurriz, të lyer e ngjyer me korrupsion, tarafe që garantojnë besnikëri vote. Njerëz të manipulueshëm.
Kaq e qartë është kjo panoramë sa nuk ndesh kund debate për programe, seminare për rritjen e ekonomisë, trajnime për kujdes më të mirë shëndetësor, kthim në atdhe të forcës punëtore që këto vite ka ikur nga sytë këmbët. Të merr malli që pozitë e opozitë të bëjnë “duele” idesh e rrugëzgjidhjesh në ekranet e shitura shqiptare. Siç bën gjithë bota e qytetari ndërkohë dëgjon, mendon, voton. Pale që është ëndërr që dy kryetarët kundërshtarë të bëjnë debat. Ata veç shahen, fyen dhe hedhin në urrejtje gjysmën e shqiptarëve ndaj gjysmës tjetër. Tash e 35 vite.
Shqipëria me këtë kod zgjedhor prodhon deputetë që perëndi kanë kryetarin, jo popullin që i voton. Ky kod prodhon banda parlamentare, jo grupe parlamentare. Ndaj bojkotin edhe pse nuk e do njeri e imponon ky kod mafioz. Më mirë djepi bosh se djalli në të, është shprehja e mençur.
