Në një qytet ku ndërtimet rriten si kërpudhat pas betonit dhe trotuaret janë kthyer në ekspozita makinash luksoze, Bashkia e Tiranës shpall me krenari suksesin e saj të radhës: 1,772 denoncime në WhatsApp për parkime të gabuara. Një arritje që tregon jo problemin, por zgjidhjen — sepse kush ka nevojë për planifikim urban, kur ka grup në WhatsApp?
Në vend që të ofrojë më shumë hapësira publike, transport urban funksional apo ndonjë vend parkimi që nuk kushton sa një pushim në Greqi, Bashkia ka zgjedhur rrugën më të thjeshtë: fajin e ka qytetari. Ai që parkohet keq. Ai që zë vendin e taksive. Ai që s’e ka “rezervuar” trotuarin.
Zgjidhja? Një numër magjik ku çdo qytetar mund të bëhet informator i rrugës — një formë moderne e fqinjit të lagjes që të kallëzon te lagjia. Madje, në 103 raste, shoferët kanë lëvizur makinën vetë! E mahnitshme, kjo është ndoshta e vetmja statistikë që s’ka nevojë për tender.
Po Bashkia? Ajo ndërton grataçela, qendra tregtare, “parqe vertikale” mbi beton dhe stadiume që duken si qendra konferencash. Hapësirat e gjelbra ngushtohen, por gjithmonë shfaqen me pamje mahnitëse në 5D në ndonjë video promocionale. Dhe kur ndokush ankohen për mungesë parkimi, përgjigjja është: “denoncoje te WhatsApp-i”.
Nëse vazhdon me këtë ritëm, Bashkia Tiranë së shpejti do të fitojë çmimin “Qyteti më i denoncuar në Ballkan”, ndërsa qytetarët do të ngrenë monument për numrin +355 68 950 0030, që për shumëkënd është bërë më i rëndësishëm se emergjencat.
Sepse në Tiranë, çdo zgjidhje është imagjinare — por denoncimi është real.
