Policia e Durrësit ka vënë në pranga një 59-vjeçar të shpallur në kërkim, në kuadër të operacionit të koduar “Ari i zi”, për kontrabandën e 670 mijë litrave naftë nga Tunizia në Durrës.
Eduart Skora, i dyshuar si një nga organizatorët kryesorë të kësaj veprimtarie të paligjshme, u arrestua në portin e Durrësit. Ndërkohë, bashkëpunëtori i tij kryesor mbetet ende në kërkim.
Gjatë këtij operacioni u arrestuan në flagrancë tre pjesëtarë të ekuipazhit të anijes dhe u proceduan penalisht në gjendje të lirë pesë të tjerë. Policia vijon hetimet për zbardhjen e plotë të kësaj çështjeje dhe kapjen e të gjithë personave të përfshirë.
Materialet i kaluan Prokurorisë për veprime të mëtejshme procedurale.
