Masakra e Dobracit është ndoshta një nga ngjarjet më të rënda të shënuara përgjatë 2024, një ngjarje me 4 viktima, dy prej të cilëve burrë e grua pa asnjë lidhje me krimin e organizuar.
Tre muaj pas kësaj ngjarje, me 4 të viktimë, ku në shënjestër ishte Hamza Lici, vëllai i të shumëkërkuarit Ibrahim Lici, po dalin në dritë detaje të reja. Së fundmi është mësuar, se një prej personave të dyshuar për atentatin mafioz është dhe Asmer Bilali, një ish-boksier, dikur mik me Ibrahim Licin, e sot armik i përbetuar i tij, i rreshtuar në bandën e Bajrave me bazë në Dobrac. Asmer Bilali ndodhet aktualisht në burgun e Recit në Shkodër dhe fill pas masakrës, hetuesit zbarkuan në qelinë e tij, sepse dyshimet ishin të forta.
Makina që u përdor në krimin tronditës kishte dalë nga rrugica që të shpie në shtëpinë e tij. Ndërsa supriza për hetuesit do të gjenden në regjistrat e burgut. Bilali rezultonte se përgjatë muajve shtator- tetor 2024 kishte patur takime shumë të shpeshta me nipin e tij, kohë gjatë së cilës dyshohet të jetë organizuar dhe vrasja. Një telefon i gjetur ne qelinë e tij, duket se është një provë e fortë për hetuesit.
Në dosje ka edhe detaje të tjera, që lidhin fijet e Asmer Bilalit me Bajrat e me grupin e Izmir Sakicaj, të cilët implikohen në vrasjen e Hamza Licin e Arlind Bushatit, ndërsa Flutura e Bashkim Basha u aksidentuan për vdekje nga makina e viktimave që doli nga rruga. Po përse hetuesit dyshojnë te Asmer Bilali? Dikur mik me Ibrahim Licin, ai është shndërruar në një prej kundërshtarëve të tij të përjetshëm. Teksa ndodhej në paraburgim pasi ishte arrestuar në kuadër të Operacionit OAZ bashkë me pjesëtarëve të grupit Bajri, Asmer Bilalit iu ekzekutuan babai e xhaxhai. Ai akuzoi për këtë krim Ibrahim Licin, ndonëse kurrë ndaj atij që njihet si “fantazma” nuk pati një akuzë zyrtare. Prej atij momenti Asmer Bilali kërkon bashkë me Bajrat kokën e Ibrahim Licit, e kur nuk arritën ta kapnin atë dhe ta ekzekutonin, nuk kursyen as të vëllain, Hamzain që rezultonte të paktën deri ditën që u vra, pa rekorde kriminale. Po ndërsa ditë pas dite hetuesit po grumbullojnë prova fajësie, ajo cfarë i tremb shumë autoritetet, por edhe grupet kundërshtare kriminale, është sesi do të reagojë Ibrahim Lici.
