Erald Cenaj, është personi i parë i arrestuar për implikim në atentatin e ndodhur më 13 janar në Vlorë, ku u ekzekutua Kristin Marku alias Kristi Bardhi.
Nga hetimet ka rezultuar se Cena nga Kukësi është personi që ka siguruar për grupin kriminal, automjetin që u përdor në vrasjen e Bardhit në aksin rrugor Fier-Vlorë. Ndaj Cenës për momentin është ngritur akuza e krijimit të kushteve për të kryer vrasje.
Nëse do të rrëfehet për hetuesit, mund të hidhet dritë mbi vrasjen e Kristian Markut. Ky i fundit është nipi i Martin Bardhit, ekzekutuar më herët në Rreshën. Familja Bardhi është në përplasje të forta me familjen Reci po nga Rrësheni.
Njoftimi i Policisë:
Veprime të thelluara hetimore, bazuar edhe në inteligjencën informative, për zbardhjen e vrasjes së ndodhur më 13 janar 2025, identifikimin, lokalizimin, kapjen dhe arrestimin e autorit/ëve.
Siguroi automjetin e përdorur për vrasjen e shtetasit Kristian Marku alias Kristian Bardhi, ndalohet 36-vjeçari me origjinë nga Kukësi.
Në vijim të veprimeve intensive nga specialistët e Sektorit për Hetimin e Krimeve të Rënda në DVP Vlorë, u bë ndalimi i shtetasit:
E. C., 36 vjeç, lindur dhe banues në Kukës, i dyshuar për veprën penale “Sigurimi i kushteve dhe mjeteve materiale për të kryer vrasje”.
Nga tërësia e veprimeve hetimore të kryera deri tani nga specialistët për Hetimin e Krimeve të Rënda në DVP Vlorë, nën drejtimin e prokurorit të çështjes, u arrit të dokumentohej se automjeti i përdorur nga autori/ët për vrasjen e shtetasit Kristian Marku alias Kristian Bardhi është siguruar nga shtetasi E. C., lindur dhe banues në qytetin e Kukësit.
Njëkohësisht, gjatë periudhës hetimore janë kryer veprime dhe janë sekuestruar prova që i shërbejnë hetimit me qëllim zbardhjen e ngjarjes.
Në bashkëpunim të ngushtë me Departamentin e Policisë Kriminale në Drejtorinë e Përgjithshme të Policisë së Shtetit dhe Prokurorinë e Juridiksionit të Përgjithshëm Vlorë, vijojnë veprimet e thelluara hetimore për zbardhjen e plotë të ngjarjes, identifikimin dhe kapjen e autorit/ëve.
