Pasi Elisa Spiropali hodhi në qarkullim platformën e saj politike dhe ndezi diskutimet për atë që po lëviz brenda Partisë Socialiste, erdhi edhe reagimi që i ngjante tabelës klasike: “Qarkulloni, nuk ka asgjë për të parë.”
Në emisionin “Off the Record” në A2 CNN, deputetja socialiste Aulona Bylykbashi u kujdes të siguronte publikun se gjithçka është në rregull dhe se në PS demokracia e brendshme është në nivele shumë të larta.
“PS është shumë e hapur… Demokracia e brendshme është në nivel aq të lartë, saqë secili nga ne dhe kolegët tanë kanë të drejtë të shprehin opinionin e tyre. Në këtë prizëm edhe znj. Spiropali ka të drejtë të shprehë çdo opinion”, deklaroi ajo.
Deri këtu tingëllon si një reklamë për një parti ku të gjithë flasin lirshëm.
Por menjëherë pas kësaj vjen fjalia që e vendos çdo gjë në vendin e vet.
“PS ka një statut, ka struktura, ku diskutohen këto pretendime të palëve… Në shtëpinë socialiste dëgjohet çdo anëtar i familjes dhe vendimmarrja është kolegjiale”, shtoi Bylykbashi.
Pra, përkthimi politik është i thjeshtë: mund të flasësh, mund të propozojnë platforma, mund të hapësh debat, madje edhe zyra në ish-Bllok, por në fund vendimi merret “në familje”. Dhe, si në çdo familje tradicionale shqiptare, të gjithë japin mendim… derisa flet kryefamiljari.
Në fakt, po të mos ishte bërë kaq shumë zhurmë rreth lëvizjeve të Elisa Spiropalit, ndoshta nuk do të kishte qenë fare e nevojshme të na kujtohej se në Partinë Socialiste secili ka të drejtë të flasë.
Sepse në politikë, kur fillon të shpjegosh sa demokratike është shtëpia, zakonisht do të thotë se dikush ka dëgjuar zëra që nuk duhej të dilnin jashtë saj.
