Teksa protestat qytetare kundër qeverisë vijojnë prej javësh në Tiranë, Këshilli i Ministrave ka miratuar 300 kuota kredish të buta me interes zero për punonjës të administratës publike. Vendimi u prezantua nga ministrja e Ekonomisë, Delina Ibrahimaj, e cila bëri të ditur se përfitues do të jenë punonjës të Policisë së Shtetit, sistemit të burgjeve, mësues, mjekë dhe ushtarakë.
Sipas vendimit, 70 kuota do t’u takojnë punonjësve të Policisë së Shtetit, 20 punonjësve të sistemit të burgjeve, 70 mësuesve, 70 mjekëve dhe 70 ushtarakëve. Kredia do të jepet me normë interesi zero.
Në vetvete, skema mund të konsiderohet një politikë sociale për të lehtësuar strehimin e punonjësve të shtetit. Megjithatë, momenti kur ajo miratohet e bën të pamundur shmangien e një leximi politik.
Prej javësh, protestat qytetare kanë vënë nën presion qeverinë. Ndërkohë, shumë punonjës të administratës, edhe pse sipas dëshmive dhe diskutimeve private ndajnë të njëjtat pakënaqësi me qytetarët, kanë zgjedhur të mos shfaqen publikisht në protesta, nga frika e pasojave që një ekspozim i tillë mund të ketë për vendin e tyre të punës.
Pikërisht në këtë klimë, qeveria miraton një paketë përfitimesh që u drejtohet një pjese të rëndësishme të administratës. Kjo nuk provon se vendimi është marrë për arsye politike, por e bën legjitime pyetjen nëse kemi të bëjmë vetëm me një politikë sociale apo edhe me një mesazh për një kategori punonjësish që përbën shtyllën e administratës shtetërore.
Qeveria nuk ka lidhur zyrtarisht kredinë me situatën politike. Megjithatë, në politikë rëndësi ka jo vetëm përmbajtja e vendimeve, por edhe koha kur ato merren. Dhe kur një përfitim ekonomik shpallet në kulmin e protestave, interpretimet janë të pashmangshme.
