Eurodeputetja e Partia e Të Gjelbërve Evropianë, Cristina Guarda, ka bërë të ditur se një delegacion i kësaj force politike do të vizitojë Shqipërinë në ditët në vijim, në kuadër të një misioni të fokusuar te protestat e qytetarëve, kërkesat për dorëheqjen e kryeministrit Edi Rama dhe çështjet mjedisore.
Në deklaratën e saj, Guarda thekson se qëllimi i vizitës është takimi i drejtpërdrejtë me qytetarët dhe shoqërinë civile, me synim kuptimin më të thelluar të protestave që po zhvillohen në vend “pa ndërmjetësim institucional”. Sipas saj, këto protesta lidhen me çështje mjedisore, të drejtat e njeriut, luftën kundër korrupsionit dhe nevojën për një model zhvillimi të pavarur nga interesat private.
Ajo u shpreh se delegacioni synon të dëgjojë drejtpërdrejt qytetarët dhe të kuptojë domethënien e këtyre zhvillimeve.
Guarda shton se procesi i integrimit europian të Shqipërisë duhet të jetë në shërbim të qytetarëve dhe përmirësimit të jetës së tyre, duke garantuar dinjitet dhe të drejta themelore. Sipas saj, standardet mjedisore dhe ato të të drejtave të njeriut duhet të mbrohen dhe forcohen vazhdimisht.
Vizita pritet të sjellë më shumë vëmendje nga institucionet europiane ndaj zhvillimeve politike dhe protestave në Shqipëri.
Ndërkohë, në protestë pritet të marrë pjesë edhe eurodeputetja gjermane Jutta Paulus, e cila ka deklaruar se do t’i bashkohet qytetarëve në Tiranë, duke theksuar rëndësinë e mbrojtjes së demokracisë, sundimit të ligjit dhe mjedisit si kauza thelbësore.
