Në Gjykatën e Sarandës u zhvillua së fundmi shortimi për çështjen penale me objekt: “Deklarim ikje të shtetasit Saimir Kushova”, i cili akuzohet për shkelje të rregullave të mbrojtjes në punë, të parashikuara nga neni 289/1 i Kodit Penal. Ky rast është i lidhur me vdekjen tragjike të 29-vjeçares angleze Rebecca Ganon, e cila humbi jetën më 19 shtator në gjirin e Sarandës, gjatë një ekspedite private zhytjesh.
Policia arrestoi Saimir Kushovën, drejtuesin e ekspeditës, menjëherë pas incidentit. Gjatë seancës për masën e sigurisë, ai u lirua me garanci pasurore prej 15 milionë lekësh. Megjithatë, pas lirimit, Kushova është zhdukur pa lënë gjurmë dhe vendndodhja e tij mbetet e panjohur.
Autoritetet vazhdojnë hetimet për zbardhjen e plotë të rrethanave të ngjarjes dhe po përpiqen të gjurmojnë vendndodhjen e të dyshuarit.
