Atentat mafioz me 3 të vrarë dhe të plagosur në Memaliaj. Viktimat janë identifikuar si Shyqyri Shaban Kalemi, Marsel Cela dhe Gledio Riza Muka. I plagosur ka mbetur Artur Kalemi, i cili ndodhet në reanimacionin e spitalit në gjendje të rëndë shëndetësore.
Atentati është bërë në lokalin që është në pronësi të fisit Kalemi në qytet, që ndodhet pranë Bashkisë dhe një nga viktimat është edhe kamarieri i lokalit.
Gjithashtu mësohet se Shyqyri Kalemi është babai i Adriatik Kalemit dhe daja i Aleksandër Sadikajt.
Policia dyshon se motivi i ngjarjes makabër është saga e hakmarrjes që vijon prej kohësh mes familjeve Sadikaj-Kalemaj me atë Papa.
Zanafilla është që nga ekzekutimi mafioz i Aleksandër Sadikaj në qershor të 2022 tek rrethrrotullimi i TEG, teksa në makinën e tij shpërtheu një sasi e madhe tritoli.
Në shenjë hakmarrje për vrasjen e Sadikaj u ekzekutua në Tiranë, Edmond Papa. Aleksandër Sadikaj është nip në familjen Kalemi në Memaliaj.
Pas vrasjes së Edmond Papës, u bënë disa atentate ndaj pjesëtarëve të familjes Kalemi. Fillimisht në një ishull në Greqi iu bë atentat Andrea alias Adriatik Kalemit. Ai mundi ti mbijetojë atentatit.
Më pas u tentua të vritej në burg, ndërsa sa fundmi në Tiranë u tentua të vritej Zamir Kalemi vëllai i Adriatik Kalemit.
Njoftimi i Policisë:
Memaliaj/Informacion paraprak
Rreth orës 23:20, në lagjen nr. 3, Memaliaj, në lokalin e shtetasit K. K., në rrethana ende të paqarta janë vrarë me armë zjarri shtetasit Sh. K., M. C., dhe G. M, si dhe ka mbetur i plagosur shtetasi A. K., i cili është transportuar për në spital, për të marrë ndihmë mjekësore.
Shërbimet e Policisë, me marrjen e njoftimit, shkuan menjëherë në vendin e ngjarjes, kanë rrethuar zonën dhe po vijojnë kontrollet.
Menjëherë janë ngritur pika kontrolli në bashkëpunim me Drejtorinë Vendore të Policisë Fier, Berat, Vlorë.
Në drejtim të Memaliajt janë nisur Forcat Speciale Renea, Forcat Kombëtare të Sigurisë si dhe drejtues të lartë të Drejtorisë së Përgjithshme të Policisë së Shtetit.
Ndërkohë është ngritur një grup i posaçëm hetimor në drejtimin e Prokurorisë dhe me ekspertë të Departamentit të Policisë Kriminale ku vijojnë punën në vendngjarje për sqarimin e rrethanave të ngjarjes, identifikimin dhe kapjen e autorit/ëve.
