Që në muajin janar, një pjesë e medias raportoi lidhur me inisiativën e grupit parlamentar të PS për ngritjen e një komisioni që do rishikonte reformën në drejtësi. Vetë socialistët duke përdorur Spiropain nxituan ti mohonin këto zëra edhe pse çka ndodhi më pas rezultoi e vërtetë.
Pak ditë më parë Edi Rama foli publikisht për një qasje të re për luftën kundër korrupsionit. Ai kërkoi përmirësime në ligjet e reformës dhe jo krejt rastësisht, ambasada amerikane me anë të një reagimi e mbështeti qasjen e kryeministrit. Se çfarë do të thotë kjo në realitet mbetet për t’u parë. E sigurt është që inisiatorët dhe mbështetësit më të mëdhenj të reformës dhe Spak nuk kanë ndërmend të bëjnë hapa pas në luftën kundër korrupsionit. Kjo, ndoshta nuk përjashton dhe përmirësimin e saj. Për të cilën inisiativa e Ramës sa kohë nuk ka asgjë konkrete nuk mund të paragjykohet prej tyre. Të paktën në mënyrë diplomatike apo publike qoftë. Për këtë arsye Rama vijoi projektin e tij me Fatmir Xhafën, si të rilindurin e radhës që merr flamurin e luftës kundër korrupsionit dhe të reformës në drejtësi. Por për ta realizuar këtë Edi Ramës i duhen më shumë se votat që ka në dispozicion PS. Dhe lypja e parë i shkoi grupit të Gazment Bardhit. Që nuk nxitoi ta hidhte poshtë ofertën edhe pse deklaroi abstenimin për rezoluteën për të njëjtën çështje. Por pavarësisht fijeve apo takimeve me palën e interesuar, grupi i Bardhit nuk ka mundur të marrë miratimin e Sali Berishës për këtë marrveshje të re me Edi Ramën. Ndërsa rikthimi i parlamentit në normalitet bashkë me amnistinë u paketuan si fitoret e Gazit, përfshirja në një komision me Fatmir Xhafën duket të jetë e papranueshme për Rithemelimin. Në mbledhjen e një dite më parë të grupit parlamentar, Gazment Bardhi, Dhurata Çupi apo Lefter Gështenja nuk e kanë fshehur përpjekjen dhe nxitjen për të marrë pjesë në këtë komision. Dhe jo rastësisht, në të njëjtën kohë që zhvillohej mbledhja, Flamur Noka doli live në një intervistë televizive duke përjashtuar çdo mundësi për votimin pro apo pjesmarrjen e Rithemelimit në këtë komision.
Ky akt i zbehu shpresat e grupit te Bardhit për të qenë dhe njëherë protagonstë të marrveshjeve me mazhorancën. Këtë herë qartas Sali Berisha ka vendosur ta luajë vetë lojën, marrveshjen apo aleancën fluide (siç i pëlqen ta quajë) me Edi Ramën. Se sa serioz është dhe do të jetë Rama për këtë inisiativë, kjo pritet të shihet gjatë muajve në vazhdim. Fakt është që draftet për ndryshimet e mundshme të reformës kanë nisur të qarkullojnë edhe në seli të ndryshme diplomatike. Dhe nëse votat e Ramës nuk mjaftojnë, parlamenti shqiptar është i aftë që në çdo legjislaturë të prodhojë “Rudina Hajdari” të gatshme për të bashkuar votat me qeverinë… në emër të opozitës që se përfaqësuan kurrë.
