Nuk më kujtohet të jenë bërë luftëra për të vërtetën. Për gratë e bukura më vijnë ndërmend disa. Në historinë e gjatë të njerëzimit, e vërteta e ngjarjeve të ndodhura ka qenë monopol i njerëzve të pasur, të fuqishmëve, i të diturve dhe gjithë atyre që janë përpjekur të mësojnë më shumë. Për njerëzit e thjeshtë, e vërteta ka qenë e vështirë për t’u prekur, parë apo dëgjuar.
Por sa të vërteta janë ato që shohim, lexojmë dhe dëgjojmë sot?
Kjo është një përgjigje vështirë për t’u gjetur, sidomos në ditët e zhytura mes kaosit dhe kakofonisë, mes lajmeve të vërteta, ato me gjysëm të vërteta apo të atyre krejt të pavërteta. Ku filtri duhet të bëhesh ti vetë e ndoshta nuk ke as dëshirën, as mundësinë dhe as kohën ta bësh këtë. Thonë që e vërteta vret apo rëndon. Por, për mua e vërteta është si uji. Nuk ka as shije të hidhur, as erë dhe as ngjyrë. E vërteta është e thjeshtë, e pastër dhe ka efektin jetik të ujit. E veç kësaj lan e shpëlan çdo gjë të pisët përqark.
Kjo do jetë dhe e vërteta jonë. E thënë kaq thjeshtë, kaq pastër dhe pa ngjyrime. E shoqëruar me fakte dhe asnjëherë e dalë nga hiçi, inatçore apo armiqësore. Vetëm e vërteta e shoqëruar me fakte është ajo që na mundëson të shohim e gjykojmë realitetin siç është. Pa ngjyra të stisura fasadash apo filtra që i japin shije të gënjeshtërt fakteve. Nuk duhet shumë mund për të faktuar e aq më pak për të verifikuar të vërtetat e të përditshmes sonë. Ky do të jetë misioni ynë. I disa njerëzve që e duan të vërtetën të faktuar, lajmet e verifikuara dhe çdo mendim të thënë troç me emër e mbiemër. Kjo platformë do të jetë dhe dritarja juaj me pamje nga e vërteta. Ku do mund të lexoni ato që shumë i dinë e pak i thonë. Dhe akoma e më pak i shkruajnë.
Askush nuk e ka monopolin e së vërtetës. As ne nuk pretendojmë të jemi pronarë të saj. Por duke na ndjekur e duke u bërë pjesë e kësaj platforme së bashku do mund të arrijmë të themi e shkruajmë të vërtetat tona të thjeshta.
Sepse siç thoshte dikush më i mençur se unë mijra vjet më parë: “Mik e kam Platonin por më mik kam të vertetën”.
