Thuajse 1 javë pas takimit të kryeministrit me shqiptarë në Athinë, debatet në atdheun tonë vijojnë në televizionet kombëtare dhe në rrjete sociale. Thënë ndryshe Rama ja arriti qëllimit të tij fillestar dhe të përhershëm. Të marrë vëmendje për kotësitë e fasadës së debatit publik në një vend që nuk e ka një luks të tillë.
Në Shqipërinë ku ministra dhe kryetarë bashkie po hetohen nga Spak për abuzime skandaloze, ku problemet dhe hallet veç shtohen, nëse një vëzhgues i jashtëm sheh dhe dëgjon ku është përqëndruar debati do mendojë thjesht dhe vetëm: “halli më i madh i shqiptarëve qënka mënyra si kryeministri ka organizuar takimin në Athinë”. Më tepër kjo merr vlerë po të ndiqje mbrëmë debatet kryesore politike të javës që trajtonin këtë temë.
Por për çfare vlejti takimi i Ramës në Athinë? A mori drejtim çështja e pensioneve, e votës së emigrantëve apo shkeljet e të drejtave të shqiptarëve në Greqi. Apo dhe për tema të tjera të ndjeshme që shqetësojnë emigrantët tanë në shtetin fqinj? Përgjigja është thjesht “aspak”. E megjithatë takimi i Ramës vijon e diskutohet në banaqet politike mediatike edhe për detajet me banale, numrin e pjesmarrësve apo analiza e detajuar e fjalimit të gjatë të Ramës. A thua këto janë hallet tona që na vështirësojnë jetën çdo ditë.
Nuk duhet shumë për të kuptuar se elementi i vetëm i ri i Athinës së Ramës ketë herë ishte stadiumi dhe numri i pjesmarrësve. Që krahasuar me numrin e shqiptarëve që jetojnë dhe punojnë në Greqi nuk ka asgjë për t’u habitur apo entuziazmuar me “mishin me kokrra” siç thone deputetet e PS. Jo më larg se vjet në mars të vitit 2023 Edi Rama ka qenë në Athinë për të çelur ekspozitën e tij ku e kanë nderuar dhe krerët më të lartë të shtetit grek. Por një vit më parë shqetësim i tij kanë qenë mënyra si janë ekspozuar pikturat e tij dhe aspak ekspozimi i problemeve të shqiptarëve në Greqi. Të gjjthë e dimë që pas 1 viti asgjë e qënësishme s’ka ndryshuar në jetën e shqiptarëve në Greqi. Përveç marrdhënies së ndryshuar me tensione mes qeverisë shqiptare dhe asaj greke. Shkaqet dihen qartë dhe kryeson ai i arrestimit së Fredi Belerit. Kjo ka sjellë dhe ndryshimin e kursit të qëndrimit të Edi Ramës ndaj Greqisë duke zëvendësuar shfaqjen e pikturave me shfaqjen e emocioneve të shqiptarëve të Greqisë.
Dhe për sa kohë e gjithë kjo lojë me emocionet patriotike të emigrantëve tanë në Greqi vijon e luhet në skenën e debatit publik dhe politik të ditës Edi Rama ja ka dalë të duket si patriot i madh dhe burrë shteti që ngre peshë zemrat e emigrantëve. Madje ja ka dalë dhe të zotërojë skenën politike të ditës ku emocioni i vetëm mbetet përgjegjësia për katandisjen e shqiptarëve por ku flitet e debatohet për flamujt e patriotizmit kallp.
