Në dosjen e Prokurorisë së Fierit rezulton se Leonidha Çobo, ish-administrator i kompanisë “Bankers”, ka faturuar edhe kompani, të cilat zotëroheshin në mënyrë të tërthortë prej tij.
Nga hetimi rezulton se Çobo ishte regjistruar si person fizik dhe faturonte fatura për llogari të kompanisë së kunatës së tij, por edhe personave të lidhur me të, sikurse u raportua një ditë më parë.
Prokuroria ka hetuar ndër të tjera edhe lidhjen e Çobos me kompaninë “LC Consulting”.
Kjo kompani është themeluar më 23 janar 2024 me aksioner 100 për qind shtetasin Leonidha Çobo. Aktiviteti i kompanisë është këshillimi për biznes dhe këshilla të tjera për menaxhim.
Përgjatë periudhës 2024-2025 konstatohen faturime nga “Leonidha Çobo” PF me subjektin “LC Consulting” në vlerën 12.695.548 lekë.
Kjo kompani, sipas prokurorisë, kontrollohet që nga themelimi nga Leonidha Çobo dhe kjo bie ndesh me parimin e pavarësisë së palëve në marrëdhënie tregtare.
“Duke qenë se subjektet janë në thelb një entitet i vetëm ligjor dhe ekonomik, kjo lëvizje ngre dyshime të bazuara për përdorim të faturave fiktive me qëllim manipulimin e të ardhurave, shmangien e detyrimeve tatimore apo justifikimin e burimeve të paligjshme”, thekson prokuroria.
Prokuroria ka bërë një hetim të kompanisë, ku rezulton se administrator është Emirjon Marku. Ky i fundit nuk paguhet me pagë, pasi deklarohet zero paga e tij dhe për këtë paguhen vetëm kontributet e sigurimeve shoqërore.
Në këtë shoqëri rezulton të jetë i punësuar Artur Çobo si konsulent investimesh, që është vëllai i Leonidhës. Artur Çobo paguhet me 150.000 lekë. Si të punësuar deklarohen një shofer dhe një punonjës serë.
“Nga tabela e të ardhurave të subjektit “LC Consulting”, ashtu si te NIPT-i tjetër “Leonidha Çobo” PF, të ardhurat vijnë nga subjektet “C.C.S.” me aksioner shtetasin Genci Likoskendaj, me të cilin janë bashkëpronarë te kompania “Tetra”, si dhe shoqëria “Bolv Oil”, e cila është një nga nënkontraktorët kryesorë të kompanisë “Bankers Petroleum Albania LTD”, thekson prokuroria.
Leonidha Çobo dyshohet nga Prokuroria e Fierit për korrupsion në sektorin privat dhe pastrim parash.
Pak javë më parë, Prokuroria e Fierit firmosi 14 urdhër-arreste dhe masa të tjera ndaluese për drejtues dhe ish-drejtues të kompanisë “Bankers”.
Kompania në fjalë, përgjatë dy dekadave, sipas prokurorisë, ka eksportuar naftë me vlerë 5 miliardë euro, në një kohë që deklaronte vetëm humbje, duke shmangur në këtë mënyrë pagesën e taksave, çka ka shkaktuar dëm të madh financiar në buxhetin e shtetit.
