Gjykata Kushtetuese e Shqipërisë ka zbardhur vendimmarrjen paraprake për kërkesën e Erion Veliaj lidhur me masën e sigurisë “arrest në burg”, duke nxjerrë në pah se pjesa dërrmuese e pretendimeve të tij janë rrëzuar si të pabazuara.
Nga leximi i dokumentit rezulton se Gjykata Kushtetuese ka marrë përsipër të rivlerësojë në themel ekzistencën e dyshimit apo nevojën për masën e sigurisë ndaj Veliajt, si dhe është fokusuar kryesisht te mënyra si janë arsyetuar vendimet nga Gjykata e Lartë.
Në aspektin procedural, Kushtetuesja rrëzoi pretendimin e Veliajt se i ishte cenuar e drejta e mbrojtjes për shkak të kohës së pamjaftueshme për njohjen me aktet e dosjes por ka pranuar cenim për shkak të mbajtjes në kafaz/kabinë xhami gjatë seancave. Po ashtu, gjykata nuk arriti shumicën e nevojshme për pretendimin që lidhej me parimin “reformatio in peius”, për marrjen e provave të reja në Apel nga SPAK.
Në aspektin substancial, Gjykata Kushtetuese rrëzoi pretendimin e Veliajt lidhur me mungesën e “dyshimit të arsyeshëm”, “rrezikshmërisë së veprës dhe personit” si dhe mos qenien e nevojeshme të vendosjes së masës së arrestit në burg. Po ashtu janë rrëzuar edhe prtebdimet e ngritura për gjuhën e përdorur nga gjykatat në raport me prezumimin e pafajësisë.
Pika e vetme ku Kushtetuesja pranoi pjesërisht kërkesën e Veliajt lidhet me mungesën e arsyetimit nga Gjykata e Lartë, lidhur me pretendimin e mungesës së proporcionalitetit të masës së sigurisë në raport me faktin që ai është një i zgjedhur me votë.
Por edhe këtu, nga dokumenti rezulton se Gjykata Kushtetuese nuk ka thënë se masa duhet ndryshuar apo shfuqizuar. Ajo ka konstatuar se Gjykata e Lartë nuk i ka dhënë një përgjigje të arsyetuar këtij pretendimi të ngritur në rekurs nga Veliaj.
Pra, në thelb, Kushtetuesja nuk ka marrë anë mbi faktin nëse statusi i një të zgjedhuri duhet apo jo të sjellë masë më të butë sigurie, por ka kërkuar që Gjykata e Lartë ta trajtojë dhe ta argumentojë në mënyrë të qartë këtë çështje në shqyrtim.
Në këtë kuptim, vendimi përbën një fitore procedurale të kufizuar për Veliajn, pasi nuk rrëzon masën e sigurisë në themel dhe as nuk pranon shumicën e tezave të ngritura prej tij, por detyron Gjykatën e Lartë të japë arsyetim më të plotë për proporcionalitetin e masës ndaj një funksionari të zgjedhur me votë.
