Pas një dekade, pritet të ketë ndryshime në kurrikulën e sistemit arsimor parauniversitar. Pas tam tameve qeveritare për përfshirjen për herë të parë programe lëndore të Cambridge, Pearson dhe Oxford-it, sot është deklaruar nga Ministria e Arsimit se do ketë një kornizë të re kurrikulare, fokus i së cilës do të jetë te kompetencat digjitale dhe integrimi i teknologjisë, duke filluar nga klasa e parë dhe duke u reflektuar deri në arsimin e mesëm të lartë. "Në këtë kuadër, kurrikula do të përfshijë lëndët STEM dhe do të përforcojë aftësitë e nxënësve në shkenca dhe matematikë. Ne do të pilotojmë klasa STEM duke u dhënë nxënësve më shumë kompetenca lidhur me shkencat dhe me mundësinë që ata më pas të integrohen në ciklet e arsimit të lartë, me kompetenca më të plota"- tha Manastirliu. Fokusi do të jetë te gjuha shqipe, duke rishikuar programet lëndore nga klasa e parë, deri në arsimin e mesëm të lartë.
