Komuniteti LGBT zhvilloi sot “Paradën e Krenarisë” në Bulevardin “Dëshmorët e Kombit”, një ngjarje që tashmë është kthyer në një traditë vjetore në Shqipëri, me qëllim promovimin e të drejtave dhe barazisë për personat LGBTQ+.
Marshimi u shoqërua me pankarta të shumta ku spikatnin mesazhe të qarta dhe të fuqishme si: “Liri, barazi, siguri”, “Mos lufto dashninë, lufto sistemin”, “Ne jemi familje” dhe “Kafshatë që s’kapërdihet është homofobia”.
Në këtë aktivitet morën pjesë edhe përfaqësues të institucioneve vendase dhe ndërkombëtare. I pranishëm ishte ambasadori i Bashkimit Europian në Shqipëri, Silvio Gonzato, i cili theksoi se ishte aty në cilësinë e përfaqësuesit të institucionit që ai drejton.
“Më lejoni të jem shumë i qartë, nuk jam këtu në cilësinë personale, edhe pse unë kam një histori timen. Por jam këtu si përfaqësues i institucionit,” tha Gonzato gjatë fjalës së tij.
Ambasadori europian theksoi se komuniteti LGBT nuk kërkon dhembshuri, por respekt dhe dinjitet. Ai bëri thirrje për ndërtimin e një shoqërie më të drejtë dhe gjithëpërfshirëse.
Në marshim mori pjesë edhe ministrja e Shëndetësisë dhe Mbrojtjes Sociale, Albana Koçiu, duke shprehur mbështetjen institucionale për të drejtat e komunitetit LGBT në Shqipëri.
Parada u zhvillua në mënyrë paqësore dhe shënoi një tjetër hap drejt ndërgjegjësimit dhe pranimit më të gjerë shoqëror për të drejtat dhe lirinë e individit.
