172 kilogram kokainë janë sekuestruar në Itali mbështjellë nën logon e klubit sportiv “KF TIRANA”. Policia e Shtetit Italian arrestoi pranë një zone industriale në komunën Rubiera (RE) tre shtetas shqiptarë, mes të cilëve dy motër e vëlla, të lindur përkatësisht në vitet 1997 dhe 2004, si dhe një i tretë i lindur në vitin 1982 (të gjithë të pastër penalisht), në kuadër të një operacioni për goditjen e trafikut të lëndëve narkotike.
Falë bashkëpunimit mes Skuadrave Mobile të Komisariateve të Bolonjës dhe Modenës, u bë i mundur sekuestrimi i një sasie të madhe prej 172 kg kokainë, me vlerë ekonomike mbi 25 milionë euro. Hetimet, të bazuara në shkëmbime të vazhdueshme dhe të vlefshme informacioni midis autoriteteve policore italiane dhe shqiptare, i mundësuan hetuesve të mësonin për mbërritjen e mundshme në Itali të një automjeti Renault Captur, me dy shtetas shqiptarë në bord, të cilët dyshohej se do të takoheshin me një korrier për të finalizuar një transaksion të rëndësishëm të kokainës.
Automjeti i dyshuar u pikas që në orët e para të mëngjesit të së mërkurës, më 5 shkurt, në Trieste, ku dy vëllezërit shqiptarë kishin kaluar natën. Oficerët e policisë i ndoqën nga afër dhe vunë re se ata hynë në autostradë dhe më pas dolën në provincën e Reggio Emilias, duke mbërritur në zonën industriale të Rubieras.
Gjatë një vëzhgimi të kujdesshëm, u monitorua mbërritja e një kamioni, drejtuesi i të cilit, me sjellje të dyshimtë, priti disa minuta përpara se të zbriste dhe t’u dorëzonte dy vëllezërve një zarf të madh dhe të verdhë. Në atë moment, hetuesit e Policisë së Shtetit vendosën të ndërhyjnë, duke arrestuar tre shqiptarët.
Brenda zarfit të madh u gjetën 15 paketa në formë paralelepipedi, që më vonë rezultuan të përmbanin 16.350 kg kokainë. Kontrolli u shtri edhe te kamioni, ku u zbulua një sasi e madhe droge, e fshehur në një ndarje të krijuar poshtë dërrasave të drurit dhe brenda vetë dërrasave. Në total, u gjetën 145 pako të tjera, të cilat gjithashtu përmbanin kokainë, me një peshë bruto prej 156 kg.
Ky sekuestrim i ka shkaktuar një dëm të madh ekonomik organizatës kriminale shqiptare, pasi vlera e drogës së konfiskuar tejkalon 25 milionë euro. Tre shtetasit shqiptarë, me urdhër të Prokurorisë së Republikës pranë Gjykatës së Reggio Emilias, u dërguan në burgun lokal.
