Duket qesharake por policia ka marr nën hetim 8 qytetarë që festuan në rrugën “Mine Peza” përballë paraburgimit 313, për arrestimin e Erion Veliajt.
Blutë e Tiranës thonë se këta persona, përveçse kanë prishur qetësinë publike, nuk i janë bindur urdhrit të policisë për t’u larguar.
“Specialistët për Hetimin e Krimeve të Komisariatit të Policisë Nr. 3 referuan materialet në Prokurori ku nisi procedimi në gjendje të lirë për veprat penale “Prishja e qetësisë publike” dhe “Mosbindja ndaj urdhrit të punonjësit të policisë”, për shtetasit S. L., E. V., M. D., B. L., A. K., K. M., A. B. dhe A. K., pasi më datë 11.02.2025, rreth orës 00:30, në rrugën “Mine Peza”, kanë prishur qetësinë publike dhe nuk iu janë bindur urdhrave të punonjësve të Policisë, për t’u larguar”, tha Policia.
Siç shihet edhe në këto pamje, disa qytetarë u grumbulluan në hyrje të paraburgimit te “Mine Peza” ku mbahet në qeli kryebashkiaku Erion Veliaj. Qytetarët shihen duke kërcyer nën tingujt e këngës “Ra faja prej fiku”.
