Deputetja e Partisë Demokratike, Jorida Tabaku, shprehu kritika të ashpra ndaj projektbuxhetit 2025 gjatë mbledhjes së Komisionit të Ekonomisë, duke e akuzuar qeverinë për neglizhencë në disa fusha kyçe. Ajo e cilësoi fushatën kundër informalitetit si një "pseudobetejë" dhe vuri në dyshim efektivitetin e saj, duke theksuar se përpjekjet për të mbledhur 10 milionë euro nga sigurimet shoqërore janë të pamjaftueshme për të mbuluar deficitin prej 450 milionë eurosh të skemës së pensioneve.
“Me cilën llogari i del qeverisë se kjo vlerë do të mbulojë 450 milionë euro që dalin nga buxheti për pensionet? Si del llogaria që kjo fushatë e informalitetit dhe këto 10 milionë euro ekstra do të mbulojnë 450 milionë euro? ” – deklaroi Tabaku.
Tabaku kritikon qeverinë për moszbatimin e vendimeve të Gjykatës Kushtetuese në lidhje me tatimin mbi profesionet e lira, dhe për trajtimin e shtresës së mesme. Po ashtu, ajo theksoi se sektori i bujqësisë është në krizë, duke e akuzuar Ministrinë e Bujqësisë dhe atë të Financave për mosmarrjen e masave për të rregulluar skemën e TVSH-së, e cila po e çon sektorin drejt falimentit.
Deputetja kërkoi gjithashtu rritje të pensioneve dhe sqarime për propozimet ligjore që kanë mbetur pa përgjigje, duke theksuar se masa për rritjen e pensioneve të propozuara nga qeveria është tërësisht e pamjaftueshme.
