Gëzim Balla është personi i radhës i shpallur në kërkim për vrasjen e ish efektivit të policisë Roland Rexhepi i njohur si Doda. Balla dyshohet se ka pasur rolin e ndihmësit pasi ka siguruar makinën që u përdor në vrasjen e Dodës. Ai është i dënuar edhe për narkotikë, po vendimi nuk kishte marrë formë të prerë dhe ka shkak afatesh. Gjykata e kishte cuar në arrest shtëpie prej nga është arratisur. Muajt u fundit u ekstradua nga Britania e Madhe i dyshuari tjetër për vrasjen e Donald Hoxhës.
Marjus Tafa e Armando Llakaj janë dënuar për të njëjtën çështje. Ndërsa Florind Shabani është në gjykim.
Roland Rexhepi, i njohur si Doda ish-oficer policie, u ekzekutua poshtë shtëpisë së tij në lagjen “Vullnetari” të Elbasanit më 22 Korrik 2009.
Njoftimi i policisë
DVP Elbasan
Vijon intensivisht puna hetimore nën drejtimin e Prokurorisë për zbardhjen dhe dokumentimin ligjor të ngjarjeve të vjetra kriminale, si dhe për identifikimin dhe kapjen e personave të përfshirë në to.
Si rezultat i hetimeve, identifikohet një tjetër autor i implikuar në një vrasje, të ndodhur në vitin 2009.
Në bashkëpunim me Interpol Tiranën dhe partnerët vijon puna intensive për lokalizimin dhe kapjen e tij.
Për këtë ngjarje janë arestuar 4 shtetas, njëri prej të cilëve është ekstraduar nga Anglia, 2 muaj më parë.
I ekstraduari nga Anglia i lokalizuar falë informacionit që dispononte DVP Elbasan dhe Departamenti i Policisë Kriminalë, si edhe shkëmbimit në kohë të informacionit me autoritetet ligjzbatuese angleze.
Sektori për Hetimin e Krimeve të Rënda në DVP Elbasan në drejtimin e Prokurorisë së Juridiksionit të Përgjithshëm Elbasan si rezultat i hetimeve intensive proaktive për zbardhjen e ngjarjeve kriminale të ndodhura më parë, si edhe identifikimin e shtetasve të përfshirë në to, identifikuan dhe shpallën në kërkim shtetasin G. B., 50 vjeç, banues në Elbasan.
Gjykata e Rrethit Gjyqësor Elbasan, ka caktuar ndaj këtij shtetasi masën e sigurisë "Arrest në burg", për veprën penale "Vrasja me paramendim", kryer në bashkëpunim dhe "Mbajtja pa leje dhe prodhimi i armëve, armëve shpërthyese dhe municionit".
Shtetasi G. B., dyshohet se në bashkëpunim me shtetasit A. Ll., M. T., F. Sh. (të arrestuar) dhe D. H., (i ekstraduar nga Anglia 2 muaj më parë), kanë vrarë shtetasin R. R., në vitin 2009, në Elbasan.
Strukturat hetimore të DVP Elbasan në bashkëpunim me Prokurorinë vijojnë intensivisht punën për sigurimin e provave me qëllim zbardhjen dhe dokumentimin ligjor të ngjarjeve kriminale të ndodhura më parë.
