Hasmëria po konsiderohet si pista kryesore e ekzekutimit të 48-vjeçarit Lulzim Visha, i cili u gjet i vrarë me armë zjarri brenda automjetit të tij në rrugën “Shën Stefani”, në Zall Mner.
Sipas burimeve, Lulzim Visha është vëllai i Besnik Vishës, i dënuar në vitin 2001 për një vrasje të kryer në 1997. Besnik Visha kishte qëlluar për vdekje Refik Domin në afërsi të Universitetit Bujqësor të Tiranës, pas një konflikti për motive të dobëta. Për këtë krim, Gjykata e Tiranës e dënoi atë me 12 vite burg për veprat penale të “Vrasjes me dashje” dhe “Armëmbajtjes pa leje”.
Një tjetër pistë hetimi është hapur nga grupi hetimor lidhur me një konflikt të dy vëllezërve me disa persona të tjerë në zonën e Zall Mnerit, që ka ndodhur dy-tre muaj më parë. Policia e Shtetit ka nisur kërkimin për një Porsche ngjyrë gri, pasi dyshohet se mund të ketë lidhje me ngjarjen dhe mund të jetë përdorur nga autorët. Përveç hasmërisë mes vëllezërve dhe personave të tjerë, hetimet po fokusohem edhe në konfliktet që ka pasur viktima dhe vëllai i tij, duke dyshuar se këto mund të kenë pasur ndikim në ngjarjen e fundit.
Njoftimi
Tiranë/Informacion shtesë.
Në vijim të informacionit paraprak të dhënë më parë për vrasjen e shtetasit L. V., ju informojmë se:
Në fshatin Zgafnor, në Zall-Herr, gjatë kontrollit të territorit nga shërbimet e Policisë është konstatuar i djegur një automjet tip “Porsche” i dyshuar i përdorur nga autori/ët e ngjarjes.
Nga këqyrja e automjetit, në brendësi të tij, është gjetur një armë e gjatë zjarri, e dyshuar si arma e përdorur nga autori/ët.
Gjatë verifikimeve për targat e automjetit ka rezultuar se targat janë të vjedhura që në muajin Prill 2023, në Kamëz.
Vijon puna intensive nga grupi i posaçëm hetimor për identifikimin dhe kapjen e autorit/ve si dhe për sqarimin e rrethanave dhe dokumentimin ligjor të ngjarjes.
