Ministria e Bujqësisë dhe Zhvillimit Rural ka njoftuar se aktualisht janë identifikuar katër vatra të gripit të shpendëve në vend: Zall Herr, Nartë, Paskuqan dhe së fundmi në Lagunën e Karavastasë, e konfirmuar më 9 janar 2025. Sipas Ministrisë, situata është nën kontroll dhe po monitorohet vazhdimisht nga strukturat përkatëse në qendër dhe rajone.
Në njoftimin e saj, Ministria ka bërë thirrje për vigjilencë nga fermerët dhe qytetarët, duke i ftuar të bashkëpunojnë me autoritetet për të parandaluar përhapjen e infeksionit. Rëndësi e veçantë u është kushtuar masave të biosigurisë, të cilat janë thelbësore për parandalimin e gripit të shpendëve.
Sëmundja e Influencës Aviare është një infeksion me përhapje globale dhe e pranishme edhe në vende të tjera, sipas Organizatës Botërore të Shëndetit të Kafshëve. Këto shtete, përfshirë Shqipërinë, zbatojnë programe të rrepta kontrolli dhe mbikëqyrjeje.
