Policia ka ndaluar një nga autorët e dyshuar të vjedhjes me dhunë në një argjendari në Kamëz, ngjarje e ndodhur më 16 maj 2026.
Sipas njoftimit zyrtar, në vijim të hetimeve të thelluara për identifikimin dhe kapjen e dy shtetasve që vodhën bizhuteri nën kërcënimin e armës, është bërë ndalimi me iniciativë i shtetasit E. H., 22 vjeç, banues në Krujë.
Nga hetimet dyshohet se 22-vjeçari është i implikuar në vjedhjen e argjendarisë në pronësi të shtetasit O. L., ku u morën një sasi bizhuterish.
Policia bën të ditur se janë sekuestruar edhe disa sende të kundërligjshme, të vlefshme për hetimin.
Ndërkohë, vijon puna për identifikimin dhe kapjen e bashkëpunëtorit tjetër, si dhe për dokumentimin e plotë të rastit.
Materialet procedurale i kaluan Prokurorisë për veprën penale “Vjedhja me dhunë”, kryer në bashkëpunim.
