Gjykata Kushtetuese shtyn vendimin për mandatin e Holta Zaçajt, pas kërkesës së saj për kohë shtesë për paraqitjen e opinionit me shkrim.
Njoftimi Sot, më datë 17.12.2024, ora 13:00, u zhvillua seanca për shqyrtimin e kërkesës së Kryetares së Gjykatës për deklarimin e mbarimit të mandatit të gjyqtares Holta Zaçaj.
Gjykata konstatoi se gjyqtarja Holta Zaçaj, në datën 16.12.2024, është njohur me praktikën dokumentare të dërguar nga Gjykata e Lartë. Para seancës së sotme, ajo depozitoi një kërkesë me shkrim, përmes së cilës kërkoi një periudhë kohore të mjaftueshme për të përgatitur opinionin e saj në lidhje me qëndrimin e Kryetarit të Gjykatës së Lartë mbi parimet kushtetuese dhe interpretimin e dispozitave kushtetuese të zbatueshme në këtë rast.
Gjykata, duke vlerësuar shkaqet e kërkesës, vendosi ta pranojë atë, duke caktuar si afat për paraqitjen e opinionit me shkrim ditën e hënë, datë 23.12.2024, ora 10:00.
Për këto arsye, si dhe për të mundësuar shqyrtimin paraprak të opinionit nga trupa gjyqësore, Gjykata vendosi të shtyjë seancën për ditën e hënë, datë 23.12.2024, ora 13:00.
