Gjykata e Posaçme e Apelit ka zbutur masën e sigurisë për Mariglen Qaton, i cili po gjykohet për atë që njihet si afera “5D”. Nga “arrest në burg”, ish-zyrtari është kaluar në masën e “arrestit në shtëpi”.
Në vitin 2025, Gjykata e Posaçme e Apelit pranoi kërkesën e Redi Mollës, duke e liruar nga qelia dhe duke e vendosur në “arrest shtëpie” për shkaqe shëndetësore, ndërsa Taulant Tusha u lirua me masën e detyrimit për paraqitje.
Tre ish-zyrtarët e Bashkisë së Tiranës, Redi Molla, Mariglen Qato dhe Taulant Tusha, të cilët konsiderohen si të besuarit e kryebashkiakut të arrestuar të Tiranës, Erion Veliaj, së bashku me zyrtarë të tjerë, akuzohen për vepra të rënda penale, përfshirë korrupsionin, pastrimin e parave dhe fshehjen e pasurisë, në lidhje me dosjen “5D”.
SPAK ka kërkuar dënim me 11 vite burg për Redi Mollën, 9 vite për Mariglen Qaton, si dhe një dënim plotësues për ndalimin e ushtrimit të funksioneve publike për 5 vjet.
Për Taulant Tushën është kërkuar dënim me 4 vite burg për shkelje të barazisë në tendera në tre raste; për të pandehurin Enton Punavija 3 vite burg, për Julian Zanajn 3 vite burg, për Albano Jankun 2 vite heqje lirie, ndërsa për biznesmenin Nestor Muhametllari 7 vite burgim.
Sipas SPAK, Redi Molla dhe Mariglen Qato zotëronin në mënyrë të tërthortë kompaninë “5D” dhe e furnizonin atë me tendera të Bashkisë, ku ata ushtronin funksionet e tyre.
