Një plagosje me armë zjarri është regjistruar mesditën e sotme në qytetin e Pogradecit, ku është qëlluar në këmbë 35-vjeçari Brian Syzo. Ngjarja ka ndodhur rreth orës 13:15, në lagjen nr. 3 të qytetit.
Policia e Pogradecit ka identifikuar dhe arrestuar autorin e dyshuar të ngjarjes, Nikolla Agolli, i cili u ndalua teksa tentonte të largohej nga zona. Së bashku me të është arrestuar edhe një person tjetër që e shoqëronte gjatë arratisjes.
Sipas të dhënave paraprake, Agolli dyshohet se pas ngjarjes u largua fillimisht nga vendi i krimit dhe më pas u kap gjatë lëvizjes me një furgon në drejtim të Prrenjasit, pasi kishte braktisur automjetin e tij në zonën e Qafë-Thanës.
I plagosuri, Brian Syzo, po merr mjekim në spital dhe ndodhet jashtë rrezikut për jetën. Ai njihet si person me precedentë të mëparshëm penalë.
Hetimet e para janë përqendruar në një konflikt të hershëm mes palëve, ku dyshohet se motivi i ngjarjes është hakmarrja. Më herët, Nikolla Agolli është plagosur në janar të vitit 2025 në një berberhane në Pogradec, në një incident ku dyshohet se është përfshirë Sindi Syzo, vëllai i të plagosurit të sotëm.
Policia po vijon veprimet hetimore për zbardhjen e plotë të rrethanave dhe sekuestrimin e provave materiale, përfshirë edhe armën e dyshuar të krimit, e cila mendohet se është hedhur në liqenin e Pogradecit.
Grupi hetimor, nën drejtimin e Prokurorisë, po punojnë për zbardhjen e plotë të ngjarjes.
