Një gjyqtar federal në SHBA ka bllokuar përkohësisht administratën e Presidentit Donald Trump nga krijimi i një fondi prej rreth 1.8 miliardë dollarësh, i cili ishte parashikuar për të kompensuar personat që sipas tij janë “viktima të armatimit të qeverisë”.
Vendimi u dha nga gjykatësja e distriktit federal Leonie Brinkema në Distriktin Lindor të Virxhinias, e cila ndaloi qeverinë të ndërmarrë çdo hap të mëtejshëm për krijimin apo funksionimin e fondit, të paktën deri më 12 qershor, kur pritet të shqyrtohen argumentet e mëtejshme ligjore.
Departamenti i Drejtësisë kishte njoftuar më herët krijimin e të ashtuquajturit “Fondi Kundër Armatimit”, si pjesë e një marrëveshjeje që lidhej me padinë e ngritur nga Trump kundër Shërbimit të të Ardhurave të Brendshme (IRS) për rrjedhjen e të dhënave të tij tatimore.
Fondi, me vlerë 1.776 miliardë dollarë, do të administrohej nga një komision prej pesë anëtarësh dhe synonte të shpërndante kompensime për individë që pretendojnë se janë prekur nga “sulme ligjore” ose “armatimi i sistemit të drejtësisë”, terma të përdorur shpesh nga Trump dhe aleatët e tij.
Vendimi i gjykatës erdhi pas një padie të ngritur nga një grup që pretendon se është shënjestruar për arsye politike dhe ideologjike, duke argumentuar se përfituesit e mundshëm të fondit nuk janë të përcaktuar në mënyrë të drejtë.
Kreu i organizatës Democracy Forward, Skye Perryman, e cilësoi vendimin si një fitore për transparencën dhe sundimin e ligjit, duke thënë se ai mbron interesin publik.
Nga ana tjetër, Departamenti i Drejtësisë deklaroi se mbetet i bindur në ligjshmërinë e fondit dhe se synon të vijojë procedurat për zbatimin e tij. Sipas zyrtarëve, kompensimet nuk bazohen në përkatësi politike, ndërsa kritikat për fondin janë hedhur poshtë si të pabazuara.
Fondi ka shkaktuar reagime të forta politike, përfshirë edhe nga disa ligjvënës republikanë, të cilët kanë shprehur shqetësim se mund të përfitojnë edhe persona të përfshirë në ngjarjet e 6 janarit 2021 në Kapitol.
Gjykatësja Brinkema theksoi se masa e përkohshme ishte e nevojshme për të ruajtur status quo-në dhe për të parandaluar shpërndarjen e pakthyeshme të fondeve përpara një vendimi përfundimtar mbi ligjshmërinë e tij.
