Një nip i familjes së Edmond Haxhisë, ky i fundit i akuzuar si organizator i vrasjes së biznesmenit Ardian Nikulaj më 19 prill 2023, në lokalin e tij në Shëngjin është ndaluar për disa orë nga pjesëtarët e fisit Nikulaj, të cilët kishin ngritur dyshime se ai mund t’i vëzhgonte.
I riu është marrë me makinë dhe është pyetur në lidhje me njohjen e tij me Edmond Haxhinë dhe pasi është mbajtur për pak kohë, Nikulajt kanë njoftuar policinë.
E paqartë mbetet se cfarë ka ndodhur gjatë kësaj kohe, nëse i riu është dhunuar apo jo, apo i është bërë presion që të mos flasë në polici.
Blutë e Lezhës kanë kontaktuar babain e të riut, i cili është marrë në pyetje për orë më radhë. Ai ka sqaruar se punon në zonën e Shëngjinit dhe iu shpërndan turistëve celësat e apartamenteve që prenotojnë për pushimet vjetore.
Policia e ka pyetur edhe në lidhje me vrasjen e Ardian Nikulajt që ishte pjesë e PSD së Tom Doshit ku i riu ka dhënë versionin e tij dhe ka mohuar të ketë lidhje me këtë ngjarjes.
Dëshmia e tij është regjistruar audio dhe video.
Policia deri më tani nuk ka bërë asnjë sqarim në lidhje me rastin apo rrethanat e tij.
Edmond Haxhia, shqiptaro-britanik është arrestuar në Britaninë e Madhe si organizator i vrasjes së Nikulajt. Si ekzekutor dyshohet portugezi Ruben Saraiva, i cili u ekstradua nga Maroku drejt Shqipërisë, ndërsa dyshohet se viktimën e vëzhguan 4 shtetas britanikë mes të cilëve dhe një grua, për të cilën po shqyrtohet kërkesa për ekstradimin e tyre drejt vendit tonë.
Edmond Haxhia, është djali i dajës së Elton Lekstakaj, i cili është në hasmëri me Nikulajt.
Përplasjeve mes fiseve Nikulaj dhe Lekstakaj e ka zanafillën në vitin 1996, ku pas një debate që nisi në një karburant në dalje të qytetit të Lezhës për 5 mijë lekë të vjetra, mbeti i vrarë ndër të tjerë edhe vëllai i Ardian Nikulaj, Pëllumb Nikulaj.
Gjakmarrja mes këtyre dy fiseve ka shkaktuar shumë të vrarë nga të krahët.
