Gjykata e Posaçme Kundër Korrupsionit dhe Krimit të Organizuar (GJKKO) ka vendosur të lërë në fuqi masën e arrestit me burg për Burim Ferizaj dhe Përparim Kalbaj, të akuzuar për futjen e shumave të mëdha parash në Shqipëri nga Zvicra, përmes sistemit informal të transferimit të parave të njohur si “Hawala”.
Sipas Prokurorisë së Posaçme Kundër Korrupsionit dhe Krimit të Organizuar (SPAK), në kuadër të këtij hetimi ndërkombëtar është arrestuar edhe një tjetër shtetas shqiptar në Zvicër, Ervis Ferizaj. Hetimet kanë zbuluar se skema e përdorur për transferimin e parave kishte si qëllim shmangien e sistemit bankar dhe shmangien e gjurmëve financiare. Për përdorimin e sistemit “Hawala”, si tarifë aplikohej një përqindje prej 6% të shumës së dërguar.
Më tej, nga të dhënat e mbledhura nga SPAK, rezulton se këto para ishin të përfituara nga veprimtari kriminale, kryesisht trafiku i drogës në territorin e Zvicrës. Paratë janë futur në Shqipëri në mënyrë të përsëritur dhe në qindra raste gjatë viteve të fundit. Për transportimin dhe legalizimin e tyre në vend janë përdorur kryesisht zyra të këmbimit valutor dhe agjenci turistike, duke u përpjekur të maskojnë origjinën e paligjshme të fondeve.
Aktualisht, përveç tre personave të ndaluar, janë në hetim edhe persona të tjerë të dyshuar si të përfshirë në këtë rrjet të pastrimit të parave dhe trafikimit ndërkombëtar të drogës. SPAK vijon hetimet në bashkëpunim me autoritetet zvicerane dhe ato ndërkombëtare për të zbardhur të plotë skemën kriminale dhe për të identifikuar të gjithë anëtarët e përfshirë.
