Policia e Tiranës ka finalizuar operacionin e koduar “Luxury Cars”, duke goditur një rrjet kriminal që trafikonte automjete luksoze të vjedhura nga Italia në Shqipëri.
Si rezultat i operacionit, është arrestuar shtetasi italian D. S., 37 vjeç, ndërsa vëllai i tij, F. S., po procedohet penalisht në gjendje të lirë.
Gjatë aksionit u sekuestruan dy automjete luksoze, një Audi Q3 dhe një BMW X6, me vlerë rreth 150,000 euro. Hetimet treguan se të dy vëllezërit kishin krijuar një skemë trafiku, duke sjellë në Shqipëri makina të vjedhura kryesisht në Itali.
Operacioni u zhvillua nga specialistët e Seksionit për Hetimin e Trafiqeve të Paligjshme të DVP Tiranë, në bashkëpunim me Komisariatin e Policisë Rinas. Policia vijon hetimet për të zbuluar persona të tjerë të përfshirë në këtë rrjet kriminal.
