Në politikën tonë 34 vjeçare, jemi mësuar tashmë me teatrin e politikanëve tanë të cilët para kamerave zihen e çfarë nuk thonë, ndërsa pas tyre gjejnë gjuhën e bashkëpunimit si të jenë nga e njëjta familje. I tillë është edhe rasti i Erion Veliajt të bashkisë Tiranë me familjen Meta-Kryemadhi i partisë së lirisë, ose ish LSI.
Nuk ka njeri që nuk e mban mend opozitarizmin e Monika Kryemadhit në kohën kur rëzultonte ajo kryetare e LSI-së, dhe që spikati me “rezistencën” kundër shembjes së Teatrit Kombëtar nga Erion Veliaj. Rezistenca e saj kulmoi deri në shoqërimin në polici. Ajo ndoshta parandalimin e shembjes së Teatrit nuk ia arriti, por ndërtimin e të riut do ta bëjë, pasi mesa duket Erion Veliajt i ka ardhur keq për sakrificën e Monës.
Bashkëpunimi Veliaj-Kryemadhi.
Në këtë dokumentin e pronësisë të një trualli në rrugën Mjull-Bathore, në Bashkinë Tiranë, pronarët janë: Fatime Kryemadhi (nëna e Monika Kryemadhit) me 12.2%, Monika Kryemadhi me 17% dhe shoqëria AGI KONS me 70.8%.
AGI KONS është në pronësi të Gentjan Sulës, i cili është konsideruar nga mediat si oligark qeveritar, përfitues i parave publike me vlerë qindra milionë euro. Shumicën e tenderave që i ka marrë me procedura të dyshimta, janë nga bashkia Tiranë.
AGI KONS në bashkëpunim me një subjekt tjetër, kanë marrë nga Veliaj tenderin për ndërtimin e teatrit të ri kombëtar, faza 1, me vlerë 18.5 miliardë lekë. Çuditërisht, bashkëpronarja e tij në pasuri të paluajtshme, Monika Kryemadhi, ishte një nga protestueset e mëdha kundër prishjes së teatrit dhe që u arrestua “dhunshëm” nga policia ditën e prishjes së tij. Për më tepër, tenderi është shënuar me flamur të kuq nga Open Data, me mbishkrimin e skualifikimit të të gjithë opeatorëve konkurrues përveç fituesit. Që mesa duket Veliaj e kishte qepur me porosi për bashkëpronarin e Kryemadhit.
Por prokurimet e dhëna nga Bashkia Tiranë për AGI KONS nuk mbaojnë këtu. Pasi shoqëria në fjalë ka marrë edhe tendera të tjerë nga Veliaj. Ndër prokurimet e fituara është edhe ai për rehabilitimin e parkut rinia me më shumë se 1 miliardë lekë. Gjithashtu tenderin për përmirësim furnizimi me ujë për zonën te “Kodra e Diellit” me vlerë 357 milionë lekë, ku vet Kryemadhi është banore aty.
Lidhja e këtyre fijeve me njëra-tjetrën, të bën të habitesh kur dëgjon zellin e sulmeve dhe deklaratave të Kryemadhit dhe bashkëpunëtorëve të saj në PL kundër kryebashkiakut Veliaj, apo të Veliajt kundër PL. E bëjnë për show mediatik, apo për të mbuluar pazaret korruptive me taksat e qytetarëve, njëra nga këto është e sigurt. Por shpjegime do u duhet t’u japin hallit që i ka zënë me prokurorët e SPAK-ut, të cilëve u paraqiten me rradhë, në mëngjes Veliaj dhe në drekë Kryemadhi.
