Një pajisje e gjetur në makinën e Ergys Agasit në momentin e arrestimit, si dhe disa materiale të zbuluara në automjetin luksoz që kishte fshehur në një garazh në Equos Resort, tradhtuan ish-shefen e Shërbimit Informativ Shtetëror, Vlora Hyseni, e cila akuzohet nga SPAK për përkrahje të autorit të krimit, si dhe nxjerrje të sekreteve shtetërore dhe ndaj saj janë caktuar dy masa: arrest shtëpiak dhe pezullim nga ushtrimi i funksionit.
Nga këqyrja e pajisjeve janë zbuluar qindra mesazhe të shkëmbyera mes tyre, ku ndër të tjera janë dërguar edhe materiale sekrete. Hyseni i drejtohet Agasit si “zemër” dhe thotë se do të përfundojnë keq, duke qenë e ndërgjegjshme, mesa duket, për fatin që e priste. Hyseni është përpjekur ta justifikojë këtë marrëdhënie me Agasin teksa është pyetur në SPAK, duke e cilësuar atë si bashkëpunëtor, por SPAK thotë se alibia e saj nuk qëndron.
Ergys Agasi, ndërkohë, drejtonte, sipas SPAK, një grup kriminal që manipulonte tenderat e AKSHI-t në bashkëpunim me Mirlinda Karçanajn, ish-drejtuese e institucionit, e Hava Delibashin, ish-zv.drejtoreshë. Hyseni ndodhej në Baku kur u firmos urdhri i arrestit shtëpiak dhe u kthye përmes Kosovës mbrëmjen e së martës. Ajo pritet të dalë përpara Gjykatës së Posaçme për masë sigurie të enjten.
