Komuniteti Mysliman i Shqipërisë ka reaguar zyrtarisht lidhur me ngjarjen e ndodhur mbrëmjen e 20 shkurtit 2026 pranë Xhamia e Namazgjasë, në një kohë kur besimtarët po falnin namazin e Teravive.
Në deklaratën e tij, Komuniteti Mysliman shpreh indinjatën e thellë për lëndimin e pajustifikuar të besimtarëve, të cilët ndodheshin në ambientet e xhamisë për të kryer ritet e tyre fetare në paqe dhe qetësi.
“Komuniteti Mysliman i Shqipërisë ka qenë gjithmonë një faktor i matur dhe i përmbajtur në qëndrimet dhe reagimet e tij publike. Megjithatë, kjo maturi nuk duhet të keqinterpretohet si tolerim i shkeljes së të drejtave dhe lirive kushtetuese të besimtarëve tanë”, thuhet në reagim.
Institucioni dënon me vendosmëri incidentin, duke theksuar se besimtarë të pafajshëm u lënduan pa asnjë shkak, ndërsa bën thirrje për maturi dhe vetëpërmbajtje nga të gjithë aktorët e përfshirë.
“U bëjmë thirrje të gjithë aktorëve të tregojnë përgjegjësi, në mënyrë që veprimet e tyre të mos cenojnë të drejtat dhe liritë e besimtarëve tanë apo të çdo qytetari tjetër”, përfundon reagimi zyrtar.
