A kanë përgjegjësi instancat shtetërore për zhdukjen e verës kontrabandë që u gjet në vilën e Ergys Agasit?
Përgjigjja është precize: po.
I pari është prokurori i çështjes, Bledat Vatnikaj. Ai duhet të firmoste urdhrin e sekuestrimit pas inventarizimit që u bë nga punonjësit e Doganave. Të shpallësh në kërkim kushëririn e Ergys Agasit pasi ke shkuar të flesh në shtëpi, ndërkohë që ke lënë pa asnjë pikë sigurie miliona euro mall të sekuestruar dhe kamerat e sigurisë së një prej personave më të kërkuar të shtetit shqiptar, nuk është thjesht papërgjegjshmëri, por krim në vetvete.
Së dyti, doganat vetë, të cilat duhet ta ruanin mallin me çdo kusht, edhe me ndihmën e policisë. Drejtori Gent Gazheli ose duhet të mbajë përgjegjësi dhe të tregojë se çfarë ndodhi natën e zhdukjes së verës disa milionëshe, ose të japë dorëheqjen, t’i dorëzohet drejtësisë dhe të rrëfejë ndoshta edhe disa të vërteta të tjera, bashkë me ato të Agasit.
Instancat e shtetit shqiptar, sa më lart, para se të shpallin në kërkim Eno Agasin, duhet të mbajnë përgjegjësi. Eno Agasi vetë duhet të arrestohet për mall kontrabandë dhe për dyshime për mall kontrabandë.
Zhdukja e verës tregon shkërmoqjen e shtetit dhe përgjegjësinë “jetime”.
