Anëtarët socialistë të Këshillit të Imunitetit dhe Mandateve bojkotuan sot mbledhjen e thirrur nga pesë deputetët e Partisë Demokratike.
Kryetari i Grupit Parlamentar të PD-së, Gazment Bardhi, njëherësh anëtar i Këshillit, deklaroi se mbledhja do të thirret sërish ditën e premte, duke e cilësuar atë urgjente dhe duke iu referuar kërkesës së SPAK.
Sipas Bardhit, në kërkesën e SPAK thuhet se Balluku ka ushtruar presion ndaj dëshmitarëve, konkretisht ndaj një vartëseje të saj. Ai shtoi se, referuar të njëjtës kërkesë, e pandehura mund të prishë apo asgjësojë prova dhe të largohet.
“Nuk janë paraqitur në një mbledhje të vlefshme. Pengimi i drejtësisë me urdhër politik të Edi Ramës është akti më i rëndë që ka kryer ky Kuvend gjatë këtyre viteve demokraci. Nuk mundet që një kryeministër të urdhërojë deputetët të mos mblidhen në Këshillin e Mandateve”, u shpreh Bardhi.
Ai bëri të ditur se për herë të parë do të lexojë pjesë nga kërkesa e SPAK, të cilat sipas tij e bëjnë të domosdoshme dhe të ngutshme mbledhjen e Këshillit. Bardhi akuzoi mazhorancën se po mbron një të pandehur për veprime korruptive që, sipas tij, kapin vlerën e 1.1 miliardë eurove.
