Prokuroria e Posaçme Antikorrupsion (SPAK) ka reaguar zyrtarisht ndaj raportimeve për sekuestrimin e telefonit të Drejtorit të Përgjithshëm të Policisë së Shtetit, Ilir Proda, duke sqaruar se një veprim i tillë nuk ka ndodhur në kuadër të hetimeve për AKSHI.
Në një përgjigje zyrtare në kuadër të programit të transparencës, SPAK thekson se Byroja Kombëtare e Hetimit (BKH) nuk ka sekuestruar telefonin e kreut të Policisë së Shtetit.
“Në përgjigje të kërkesës suaj, ju informojmë se Byroja Kombëtare e Hetimit (BKH) nuk e ka sekuestruar telefonin e Drejtorit të Policisë së Shtetit”, thuhet në përgjigjen zyrtare të SPAK.
Sqarimi vjen pas lajmeve që qarkulluan në dhjetor të vitit të kaluar, të cilat e lidhën emrin e drejtorit të Policisë me hetimet ndaj AKSHI-t.
Por në fakt, raportimet reale lidhen me një tjetër çështje: sekuestrimin e celularit të Ilir Prodës në kuadër të hetimeve për dekonspirimin e aksionit për ndalimin e njërit prej anëtarëve të bandës së “Copjave” në vitin 2024.
Pra, mohimi i SPAK për dosjen AKSHI nuk rrëzon pretendimet për një hetim tjetër, të lidhur me rrjedhjen e informacionit operacional dhe komprometimin e një operacioni policor ndaj një grupi kriminal në kohën kur Ilir Proda ishte drejtues i policisë së Elbasanit në 2024.
Pavarësisht përpjekjeve për ta zhvendosur debatin drejt një çështjeje tjetër, faktet që lidhen me dekonspirimin e aksionit ndaj bandës së “Copjave” mbeten të ndara nga sqarimi formal i SPAK — dhe drejtori i Përgjithshëm i Policisë nuk mund ta mbulojë të vërtetën pas një mohimi selektiv.
