Me të njëjtin skenar si protestën e kaluar kombëtare, PD mblodhi sërish sot mbështetësit e saj në shesh me thirrje kundër kryeministrit Edi Rama. Folësit që u ngjitën në podium ishin në sinkron me njëri-tjetrin, duke përsëritur të njëjtat akuza dhe shpërndarë të njëjtën shpresë se fitorja është shumë afër.
Në të njëjtën linjë, edhe kryetari i PD-së përsëriti akuzat ndaj qeverisë dhe Edi Ramës, duke akuzuar këtë herë mazhorancën se është përpjekur të bëjë një grusht shteti kundër drejtësisë.
Ashtu siç pritej, fundi i fjalimit të tij u pasua me hedhjen e disa bombave të improvizuara molotov kundër godinës së Kryeministrisë — një numër më i vogël në fakt se ato të protestës së dy javëve më parë, çka duket se e shtyu policinë të reagojë vetëm duke hedhur ujë dhe jo gaz lotsjellës.
Kjo situatë zgjati disa minuta, ndërsa protesta u zhvendos përballë Parlamentit. Atje, bashkë me disa deputetë të PD-së, protesta shkoi drejt fundit me hedhje të një numri më të madh bombash molotov drejt Parlamentit. Situata u rëndua dhe policia hodhi edhe gaz lotsjellës për të shpërndarë protestuesit. Gjatë incidenteve u raportua për disa pjesëtarë të forcave të rendit dhe protestues të lënduar.
Mesa duket, plani për të vendosur një çadër dhe për ta vijuar protestën pa ndalesë përballë Kryeministrisë nuk u realizua këtë herë nga PD, ose mund të jetë shtyrë në një kohë të dytë.
