Kryetari i Partisë Demokratike, Sali Berisha, deklaroi se Ervin Salianji është vetëpërjashtuar nga PD pasi, sipas tij, ka shkelur në mënyrë flagrante statutin e partisë.
I pyetur për deklaratën e deputetes Jorida Tabaku, e cila tha se “PD nuk ka luksin të humbasë askënd”, Berisha u përgjigj se ky është vetëm mendimi personal i saj.
“Deputetja ka shprehur mendimin e vet dhe kjo është normale. Së dyti, ai nuk është përjashtuar, por është vetëpërjashtuar. Vetëpërjashtimi është kur ti shkel në mënyrë flagrante ato çka thotë statuti i partisë tënde,” tha Berisha.
Ai shtoi se pas daljes nga burgu, Salianji nuk ka pasur asnjë funksion në strukturat drejtuese të partisë, as në Këshillin Kombëtar dhe as në Kryesi, duke theksuar se kjo ishte bërë për ta respektuar.
Sipas Berishës, veprimet e tij treguan se nuk ishte i denjë për të mbajtur përgjegjësi në parti.
Kreu i PD-së theksoi gjithashtu se Partia Demokratike ka një qëndrim të prerë ndaj çdo forme bashkëpunimi me krimin.
“Bashkëpunimin me krimin nuk ta fal kjo parti, e kemi të prerë në mënyrë absolute,” deklaroi Berisha.
