Teksa vijon marshimi i opozitës në Tiranë, ka ardhur edhe reagimi i ministres së Brendshme, Albana Koçiu. Përmes një postimi në rrjetet sociale, ajo dënoi përdorimin e molotovëve dhe aktet që, sipas saj, synojnë përshkallëzimin e situatës.
Koçiu u shpreh se afrimi drejt godinës së Policisë së Shtetit me mjete zjarrvënëse nuk përbën akt proteste, por një provokim të hapur ndaj institucioneve.
“Të shkosh me molotovë në duar drejt godinës së Policisë së Shtetit nuk është një akt proteste, por një provokim i hapur dhe një dëshirë e ethshme për përshkallëzim, duke tentuar të delegjitimohet forca e ligjit përballë presionit të rrugës”, shkroi ajo.
Ministrja shtoi se protestuesit “marshojnë si çlirimtarë në rrugët e kryeqytetit”, ndërsa, sipas saj, janë po ata që qytetarët kanë lënë jashtë pushtetit me votë.
Në reagimin e saj, Koçiu përdori edhe tone kritike ndaj opozitës, duke e krahasuar me “Don Kishotin që grindet me mullinjtë e erës” dhe duke e akuzuar se po e kthen një parti politike në “repart zjarrvënësish”.
