Dy deputetët e Partisë Demokratike, Flamur Noka dhe Xhelal Mziu, janë vënë nën hetim pas incidenteve të ndodhura gjatë protestës së 20 shkurtit përpara Parlamentit.
Sipas njoftimit zyrtar, specialistët për Hetimin e Krimeve kundër Jetës dhe Pronës kanë referuar materialet në Prokurori, ku ka nisur procedimi penal ndaj shtetasve F. N. dhe Xh. M., pas kallëzimit të bërë nga shtetasit K. M. dhe T. T.
“Specialistët për Hetimin e Krimeve kundër Jetës dhe Pronës referuan materialet në Prokurori, ku nisi procedimi penal për shtetasit F. N. dhe Xh. M., pasi ndaj tyre kanë kallëzuar shtetasit K. M. dhe T. T. se, më datë 20.02.2026, gjatë tubimit të zhvilluar nga subjekti politik Partia Demokratike, janë shtyrë dhe goditur prej tyre”, thuhet në njoftimin e policisë.
Sipas kallëzuesve, Hetem Toraj dhe një i njohur i tij janë gjendur rastësisht para Parlamentit në momentin e përplasjes. Deputetët, sipas pretendimeve, i kanë konsideruar ata si punonjës policie që po arrestonin protestues dhe në këtë kontekst ka ndodhur incidenti.
Çështja tashmë është në dorë të Prokurorisë, e cila pritet të hetojë rrethanat e plota të ngjarjes.
