Kreu i lëvizjes “Shqipëria Bëhet”, Adriatik Lapaj, reagoi me tone ironike pas protestës së organizuar nga Partia Demokratike e Shqipërisë, duke theksuar se beteja e vërtetë politike kërkon qëndresë të pandërprerë dhe jo largim pas disa orësh në shesh.
Në një deklaratë publike, Lapaj u shpreh se shumë mbështetës të opozitës i kanë kërkuar bashkimin me protestën, por ai ka vënë në pikëpyetje qëllimin e kësaj thirrjeje.
“Shumë demokratë më thanë: ‘Adriatik, ejani bashkohuni me ne’, por unë iu përgjigja: të bashkohemi për çfarë? Nëse bëhet fjalë për të qëndruar në shesh dhe për ta detyruar Edi Ramën të tërhiqet, ne jemi këtu, dakord. Por nëse duhet të bashkohemi që pas dy orësh të largohemi sërish, këtë nuk e bëjmë,” deklaroi ai.
Sipas Lapajt, qëndresa e vazhdueshme në protestë po i jep jehonë çështjes edhe në arenën ndërkombëtare, ndërsa njëkohësisht po rrit presionin ndaj aktorëve të tjerë opozitarë për t’iu bashkuar kauzës.
“Me qëndresën tonë nuk po lejojmë që kjo plagë të mbyllet; përkundrazi, po ushtrojmë presion edhe mbi aktorë të tjerë opozitarë që të vijnë këtu dhe të përballen,” theksoi kreu i “Shqipëria Bëhet”.
