Erion Veliaj do të ulet sot për herë të parë në kafazin prej xhami të Gjykatës së Posaçme për të nisur përballjen zyrtare me drejtësinë. Ai është tashmë i pandehur për 13 akuza penale, si korrupsion, pastrim parash, fshehje pasurie, shpërdorim detyre dhe futje e sendeve të paligjshme në ambientet e vuajtjes së dënimit. Veliaj do të gjykohet duke qenë në detyrën e kryetarit të Bashkisë më të madhe në vend, e dikur ylli në ngjitje i Partisë Socialiste.
Nga sot, ai është një i pandehur që do të synojë rrëzimin e akuzave të SPAK. Njëherazi me të, do të ulen në bankën e të akuzuarve bashkëshortja e tij, Ajola Xoxa, familjarë e bashkëpunëtorë të kësaj të fundit, ish-deputetja socialiste Klotilda Bushka, si dhe disa biznesmenë të njohur në vend.
Procesi pritet të jetë i gjatë pasi Veliaj dhe të pandehurit e tjerë nuk kanë kërkuar gjykim të shkurtuar. Prokurorët e posaçëm Ols Dado dhe Altin Dumani do të jenë të parët që do të relatojnë provat, e më pas avokatët e të pandehurve që në javët në vijim do të ripërsërisin kërkesat për pavlefshmëri të akteve hetimore.
Erion Veliaj mbahet në paraburgim që prej 10 shkurtit 2025. Ai i ka kundërshtuar akuzat dhe pretendon për shkelje të kryera gjatë procesit hetimor.
