Në ditën kur drejtoresha e Agjencisë Kombëtare të Shoqërisë së Informacionit, Mirlinda Karcanaj, u vendos nën masën e “arrestit shtëpie”, kryeministri Edi Rama, sikur të mos kishte ndodhur asgjë, mori pjesë në një tryezë ku foli për të drejtën e informimit dhe lirinë e medias.
Gjatë fjalës së tij, kryeministri Edi Rama deklaroi se qeveria ka marrë angazhimin për dekriminalizimin e shpifjes për gazetarët, duke theksuar se ndër vite nuk ka pasur padi penale ndaj gazetarëve nga ana e ekzekutivit.
“S’është se ka pasur ndonjë gazetar të goditur penalisht nga paditë e qeverisë në këto vite. As nuk ka pasur padi për gazetarët, i kemi ndaluar prej vitesh,” u shpreh Rama, duke shtuar se ky hap synon të relaksojë më tej situatën dhe të forcojë lirinë e medias.
Sipas tij, qeveria nuk mjaftohet me shprehje vullneti, por synon ta materializojë atë në mënyrë sistematike me progres konkret. “Do ta bëjmë edhe këtë hap tjetër që shkon drejt relaksimit të situatës së gazetarëve në tërësi,” tha Rama.
Po ashtu, kryeministri paralajmëroi sanksione për ministrat dhe sekretarët e përgjithshëm që nuk respektojnë detyrimin për dhënien e informacionit.
“Ngurrimi për të ndarë informacion, edhe kur bëhet fjalë për fakte administrative, është absurd dhe dëmton më shumë sesa mbron,” tha Rama, duke theksuar se mungesa e transparencës krijon dyshim.
Ai solli si shembull masat e marra më herët ndaj deputetëve që parkonin në trotuare dhe lulishte, duke nënvizuar se ato funksionuan. “Roli i disave është ta shohin gotën gjysmë bosh, i yni është ta shohim gjysmë plot,” përfundoi Rama.
