Erion Veliaj i kërkon Këshillit Bashkiak të Tiranës që miratimi i buxhetit për vitin 2026 të mos bëhet pa konsultim me të, duke theksuar se, sipas ligjit, mendimi i kryetarit të zgjedhur është i domosdoshëm për një proces të rregullt dhe legjitim vendimmarrës. Kërkesa është bërë përmes një letre drejtuar Këshillit Bashkiak, në prag të diskutimit dhe miratimit të buxhetit, që pritet të zhvillohet më 18 dhjetor.
Në letrën e tij, kryetari i Bashkisë së Tiranës nënvizon se miratimi i buxhetit pa një konsultim real me të do të përbënte një devijim nga standardet e qeverisjes vendore, si edhe një pengim të realizimit të mandatit të tij demokratik. Veliaj thekson se një vendimmarrje e tillë do të binte ndesh me parimet ligjore që rregullojnë funksionimin e pushtetit vendor.
Sipas kryebashkiakut, nëse buxheti miratohet “pa konsultim real dhe substancial me Kryetarin e zgjedhur, ai nuk mund të konsiderohet shprehje e vullnetit politik të qytetarëve, por vetëm një akt formal administrativ, i zhveshur nga legjitimiteti demokratik”.
Në letrën drejtuar Këshillit Bashkiak, Veliaj parashtron edhe disa kërkesa konkrete. Së pari, ai kërkon zhvillimin e një konsultimi institucional me të për buxhetin. Së dyti, kërkon që dëgjesat publike të zhvilluara pa konfirmimin e tij të mos merren në konsideratë. Së treti, thekson se buxheti nuk duhet të miratohet pa propozimin apo konfirmimin e tij, pasi një veprim i tillë do të përbënte shkelje ligjore.
Kujtojmë se Gjykata Kushtetuese e riktheu Erion Veliajn në detyrë në fillim të muajit nëntor. Kushtetuesja rrëzoi vendimin e qeverisë për shkarkimin e tij nga detyra e kryebashkiakut të Tiranës, si edhe dekretin e Presidentit Bajram Begaj për zhvillimin e zgjedhjeve në kryeqytet.
