Në një intervistë në Top Channel, deputeti socialist Erion Braçe ka komentuar debatet e fundit brenda Partisë Socialiste dhe diskutimet që pasuan përplasjen mes kryeministrit Edi Rama dhe Elisa Spiropalit gjatë mbledhjes së grupit parlamentar.
Braçe theksoi se në Partinë Socialiste investimi kryesor është bërë nga vetë partia tek individët dhe jo e kundërta, ndërsa shtoi se shumë socialistë të thjeshtë në vite kanë pritur nga PS më shumë se sa kanë marrë.
Sipas tij, brenda partisë ka edhe raste kur disa persona kanë përfituar më shumë se sa meritojnë nga pozicionet që kanë marrë.
I pyetur nëse Spiropali është një rast i tillë, Braçe shmangu të bëjë gjykime personale për kontributet e figurave brenda PS-së, duke theksuar se nuk është ai që duhet të vendosë se kush çfarë meriton.
Ai nënvizoi se çështjet e brendshme të partisë duhet të diskutohen brenda saj dhe jo të dalin në publik, por pranoi se disa nga shqetësimet e ngritura nga Spiropali janë reale dhe ndahen edhe nga figura të tjera brenda PS.
Sipas Braçes, vetë fakti që brenda Partisë Socialiste flitet për nevojën për ta rihapur dhe rienergjizuar partinë, si dhe për ta bërë atë më demokratike, tregon se ekzistojnë probleme që duhen adresuar.
