Elisa Spiropali reagoi sot publikisht në rrjetet sociale, një ditë pas mbledhjes së tensionuar të grupit parlamentar të Partisë Socialiste, ku kryeministri Edi Rama i dha një ultimatum deputetëve: “ose me ne, ose kundër nesh”.
Ish-kryetarja e Kuvendit, e cila sipas burimeve tentoi të replikonte gjatë mbledhjes por nuk u lejua nga Rama, ka zgjedhur të përgjigjet përmes një statusi të gjatë në Facebook me titullin “Më përjashto”.
Në reagimin e saj, Spiropali paralajmëron se debatet e brendshme nuk duhet të kthehen në “spektakël ndëshkimor publik”, duke lënë të kuptohet se klima brenda partisë po bëhet gjithnjë e më e mbyllur ndaj kritikës.
“Kur paralajmërimi publik bëhet instrument kërcënimi, heshtja nuk është më maturi, është dorëzim”, shkruan ajo.
Spiropali thekson se nuk ka sulmuar Partinë Socialiste, por modelin e funksionimit që, sipas saj, po e dëmton edhe vetë partinë. Ajo flet për rrezikun e një sistemi ku politika zëvendësohet nga administrimi dhe ku “drejtorokracia” mund të zbehë përfaqësimin politik.
“Nëse të kërkosh garë e meritë është faj, më përjashto. Nëse të kërkosh që pushteti të njohë vetëkufizim është herezi, më përjashto”, shkruan Spiropali.
Ajo shton se mospajtimi në politikë nuk është thyerje e besnikërisë, por “forma më e lartë e besnikërisë”, duke paralajmëruar se një parti ku askush nuk kundërshton nuk është e fortë, por e heshtur.
Në fund të reagimit, Spiropali thekson se çështja nuk është personale, por lidhet me mënyrën se si kuptohet politika dhe pushteti brenda një force qeverisëse.
