Kryetari i Partisë Demokratike, Sali Berisha, ka vijuar edhe sot sulmet e ashpra ndaj Gjykatës Kushtetuese dhe anëtarëve të saj për zvarritjen e vendimit mbi kërkesën e kryeministrit Edi Rama lidhur me çështjen Balluku.
Në një deklaratë me tone tejet të ashpra, Berisha e quajti sjelljen e Gjykatës Kushtetuese “shfaqjen më të turpshme në historinë e drejtësisë shqiptare dhe botërore”, duke akuzuar gjyqtarët se kanë tradhtuar jo vetëm ligjin, por edhe dinjitetin e tyre institucional.
“Patë show-n më të turpshëm në historinë e drejtësisë shqiptare e botërore të GJK-së, se si njerëzit, të vendosur nga Kushtetuta në një nga pozicionet më të larta të shtetit, provojnë se janë të degraduar e të degjeneruar në shkallë ekstreme në raport me ligjin e dinjitetin e tyre. Nuk kanë nder, dinjitet e as moral zyrtari. Janë një turp për vete, familjen dhe për një komb të tërë”, u shpreh Berisha.
Megjithatë, edhe sot, pavarësisht retorikës së ashpër, kreu i PD-së shmangu të përmendë me emra se cilët janë konkretisht anëtarët e Gjykatës Kushtetuese që, sipas tij, po bllokojnë vendimin.
Kjo heshtje bie në sy, pasi në raste të tjera Berisha ka treguar gatishmëri të plotë për të identifikuar dhe etiketuar me emër gjyqtarë, prokurorë të SPAK-ut apo anëtarë të institucioneve të drejtësisë që ai i ka konsideruar të kapur apo të politizuar.
Sot, megjithatë, akuzat mbetën kolektive dhe pa adresë të saktë, duke lënë pa përgjigje pyetjen kryesore: kush janë sipas Berishës “bllokuesit” realë brenda GJK-së dhe pse nuk i thotë publikisht?
